कोलम्बो, श्रीलङ्कामा केही दिन देखिको सुख्खा मौसमका कारण ५० हजार मानिस प्रभावित भएका छन् ।
देशको प्रकोप व्यवस्थापन केन्द्रले सोमबार दिएको जानकारी अनुसार पहाडी मुलुक श्रीलङ्कामा केहीदिन देखि सुख्खा मौसम रहेको छ ।
सवै भन्दा धेरै भाभुनिया र जफ्नाको उत्तरी भाग, पुट्टालाम, केगाल्ले, माटालेलगायतका ठाँउ प्रभावित भएको अधिकारीहरुले जनाएका छन् ।
विषेश गरेर पहाडी क्षेत्रमा लामो समयदेखि बर्षा नहुदा पानीको अभाव हुन थालेकोले जनजीवन प्रभावित भएको उनीहरुको भनाई छ ।
प्रकोप व्यवस्थापन केन्द्रका उप निर्देशक प्रदिप कोडिप्पीलीले सुख्खाबाट प्रभावित क्षेत्रमा बस्नेहरुका लागि पानी वितरण गर्ने उपकरणहरु पठाइएको जानकारी दिनुभयो ।
प्रभावित क्षेत्रका बासिन्दालाई यस्तै मौसम रहेसम्म घरभित्रै बस्न र विषेश ख्याल गर्न आग्रह गरिएको पनि उहाँले बताउनु भयो ।
मौसम विभागले दिएको पछिल्लो विवरण अनुसार अहिले सुख्खापना थप बढ्दै गएको छ । आगामी केही दिन अझै सुख्खा हुने देखिएको विभागको अनुमान छ । त्यस क्षेत्रको तापक्रम ४१ डिग्रि सेल्सीयस पुग्ने मौसम अधिकारीहरुले अनुमान गरेका छन् । रासस-सिन्ह्वा

१ बैशाख २०७६, आईतवार ०४:३८ मा प्रकाशित