दीपेन्द्र बस्नेत
झलारी , साउन ८
कञ्चनपुरको शुक्लाफाँटा नगरपालिकामा कृषकहरुको दक्षता वृद्धि गरि उत्पादन बढाउन कृषि लक्षित योजना बनाइएको छ ।
आर्थिक उपार्जनका लागि कृषिलाई व्यावसायिक बनाउन कञ्चनपुरको शुक्लाफाँटा नगरपालिकाले चालू आर्थिक वर्षका लागि ४५ लाख बिनियोजन गरेको छ ।
नगरका कृषकहरुको आर्थिक स्तर उकास्न सघाउने उदेश्य लिएर कृषि क्षेत्रलाई आधुनिक र ब्यबसायिक बनाइ कृषकको आय स्तर उकास्न कृषिलाई प्राथमिकतामा राखेको नगरपालिकाले जनाएको छ ।
चालू आर्थिक वर्षका लागि शुक्लाफाँटा नगरपालिकाले कृषिमा ३० लाख र पशुपालन तर्फ १५ लाख बजेट बिनियोजन गरेको छ ।
१२ वटा वडामा बिभाजन गरिएको शुक्लाफाँटा नगरपालिकामा कृषि तर्फ मौसमी तथा बेमौसमी तरकारी खेती ,छोटो अवधिमा तयार हुने तरकारी , केरा खेती तर्फ कृषकलाई प्रोत्साहन गरि आर्थिक समृद्धि ल्याउन सघाउने लक्ष लिइएको नगर प्रमुख दिलबहादुर ऐरले बताए । यसरीनै पशुपालनमा बाख्रा , भैंसी पालनमा समेत कृषकहरुलाई प्रोत्साहित बनाउने कार्यमा नगरपालिका लागेको नगर प्रमुख ऐरले बताए ।
नगरपालिका भित्रका जनता कृषिमा आधारित भएकाले पनि कृषि क्षेत्रलाई ब्यबसायिक बनाउन नगरपालिकाले बिशेष कार्यक्रम ल्याएको उप प्रमुख शुशिला देवि हमालले बताइन् ।  उनले भनिन्  शुक्लाफाँटालाई तरकारी र केरा खेति पकेट क्षेत्र बनाउने लक्ष्यका साथ नगरपालिकाले कार्य गरेको छ । जनजाति बाहुल्यता भएको यस क्षेत्रमा कृषिलाई सबल बनाएर आर्थिक समृद्धि तर्फ लैजान नगरपालिकाले प्रयास गरेको उप प्रमुख हमालले बताइन् ।
बिगतका वर्षहरु भन्दा यस वर्ष कृषि क्षेत्रलाई बिशेष महत्व दिदै चालू आर्थिक वर्षको बजेटमा समेटेको शुक्लाफाँटा नगरपालिकाले कृषि उत्पादनमा आत्मनिर्भर बनाउने प्रयत्न थालेको छ ।
५० प्रतिशत अनुदानमा कृषकहरुलाई धान र गहुँको बीउ बितरण गर्ने योजना नगरपालिकाले अघि बढाएको प्रमुख प्रशासकीय अधिकृत बिशनसिंह थापाले बताए ।  धान र गहुँको बीउ उत्पादन , तरकारीको नर्सरी उत्पादनमा कृषकहरुलाई तालिम दिई दक्ष कृषक बनाउने योजना नगरपालिकाको रहेको प्रमुख प्रशासकीय अधिकृत थापाले बताए । 

८ श्रावण २०७६, बुधबार १५:२९ मा प्रकाशित